భవిష్యత్తుతో ఆటలు

మళ్లీ మూతపడిన రాష్ట్ర క్రీడా పాఠశాల

మధ్యలోనే ఆగిపోయిన నిర్మాణ పనులు

విజయనగరం క్రీడలు, న్యూస్‌టుడే: జిల్లా అభివృద్ధిలో కీలకంగా ఉన్న రాష్ట్ర క్రీడా పాఠశాల నిర్వహణ గాడితప్పుతోంది. కరోనా, నిధుల కొరత, సిబ్బంది లేమి.. తదితర కారణాలతో ఇప్పటికే పలుమార్లు మూతపడగా.. తాజాగా జీతాలు లేవని కొందరిని తొలగించడంతో మరోసారి గేట్లు పడ్డాయి. సిబ్బంది లేకుండా నడపలేమని, పర్యవేక్షణ కష్టతరమవుతోందని జిల్లా అధికారులు కూడా చేతులెత్తేశారు. ఈక్రమంలో వివిధ జిల్లాలకు చెందిన సుమారు 60 మంది విద్యార్థులు ఇబ్బందులు పడుతున్నారు.

పరిస్థితి ఇదీ..

క్రీడల్లో రాణించే ప్రతిభావంతులైన పిల్లలకు విద్యతో పాటు వివిధ క్రీడా అంశాల్లో శిక్షణ ఇచ్చేందుకు గత ప్రభుత్వ హయాంలో విజ్జీ మైదానంలో సుమారు రూ.20 కోట్లతో క్రీడా పాఠశాలను ఏర్పాటుకు నిర్ణయించారు. తొలి విడతగా పది శాతం నిధులు మంజూరయ్యాయి. ఇంతలో కొందరు చేరగా, వారికి ఇబ్బంది లేకుండా విజ్జీ ప్రాంగణంలోనే ఒక తాత్కాలిక భవనాన్ని తీసుకొని తరగతులు సైతం ప్రారంభించారు. ఇంతలో ప్రభుత్వం మారడంతో పనులు మధ్యలోనే ఆగిపోయాయి. తరగతులు మాత్రం కొనసాగేవి. ఈక్రమంలో కరోనా రావడంతో విద్యార్థులను ఇళ్లకు పంపేశారు. ఇటీవల రాజీవ్‌ మైదానం వేదికగా మళ్లీ ప్రారంభించారు. నిధులు లేవని మళ్లీ ఆపేశారు.

తొలగింపు: విద్యాశాఖ ద్వారా ఇద్దరు ఉపాధ్యాయులను, క్రీడాశాఖ ద్వారా పలువురు శిక్షకులను తీసుకున్నారు. 2018లో పాఠశాల నిర్వహణ నిమిత్తం 11 మందిని తాత్కాలిక ప్రాతిపదికన నియమించారు. తాజాగా జీతాలు ఇవ్వడానికి బడ్జెట్‌ లేదని ఈ 11 మందిలో ఏడుగురిని తొలగించారు.

ఇబ్బంది లేదు..

ప్రస్తుతానికి సెలవులు ఇచ్చాం. త్వరలోనే ప్రారంభిస్తాం. జీతాలు, బడ్జెట్‌ వివరాలను ఉన్నతాధికారులకు పంపించాం. ఇక నుంచి ఎలాంటి ఇబ్బందులు లేకుండా కొనసాగిస్తాం. పాఠశాల నిర్మాణానికి సంబంధించి కూడా స్పష్టమైన ఆదేశాలు రానున్నాయి. - ఎస్‌.వెంకటేశ్వరరావు, క్రీడా శాఖ ముఖ్య శిక్షకుడు