Tollywood: చిరంజీవి అధ్యక్షతన తెలుగు సినీ ప్రముఖుల భేటీ! ఎందుకంటే..? - tollywood top celebrities meet headed over by megastar chiranjeevi
close
Updated : 16/08/2021 16:10 IST
Facebook Share Twitter Share WhatsApp Share Telegram Share Link Share

Tollywood: చిరంజీవి అధ్యక్షతన తెలుగు సినీ ప్రముఖుల భేటీ! ఎందుకంటే..?

ఇంటర్నెట్‌ డెస్క్‌: తెలుగు చిత్రపరిశ్రమ ఎదుర్కొంటున్న సమస్యలకు పరిష్కారం దిశగా అడుగులు పడుతున్నాయి. ఇండస్ట్రీలో నెలకొన్న సమస్యలపై పరిశ్రమ పెద్దలతో చర్చించేందుకు ఆంధ్రప్రదేశ్‌ ముఖ్యమంత్రి జగన్‌మోహన్‌రెడ్డి ఇటీవల సుముఖత వ్యక్తం చేశారు. అతి త్వరలోనే ఈ సమావేశం జరిగే అవకాశం ఉంది. ఈ నేపథ్యంలో అగ్ర కథానాయకుడు చిరంజీవి అధ్యక్షతన తెలుగు సినిమా ప్రముఖులతో సమావేశం ఏర్పాటు చేశారు. ముఖ్యమంత్రితో భేటీ కానున్న నేపథ్యంలో ఆయనతో ఏం మాట్లాడాలి, ఏ అంశాలు ప్రస్తావించాలి అనే విషయంపై చర్చించినట్లు తెలుస్తోంది. సోమవారం జరిగిన ఈ భేటీలో చిరంజీవి, నాగార్జున, అల్లు అరవింద్‌, సురేశ్‌బాబు, దిల్‌రాజు, వి.వి.వినాయక్‌, కొరటాల శివ, మెహర్‌ రమేశ్‌, ఆర్‌.నారాయణమూర్తితో పాటు పలువురు సినిమా ప్రముఖులు పాల్గొన్నారు. ఆంధ్రప్రదేశ్‌లో ఇటీవల వచ్చిన కొత్త జీవో విషయంలో దర్శకనిర్మాతలు విముఖత వ్యక్తం చేస్తున్న విషయం తెలిసిందే. ఆ జీవో అమలును పునరాలోచించడంతో పాటు టికెట్‌ ధరలు, ఇతర సమస్యలను భేటీ సందర్భంగా సీఎం జగన్‌కు వివరించనున్నారు. కరోనా వల్ల తీవ్ర నష్టాల్లో కూరుకుపోయిన ఇండస్ట్రీని ఆదుకోవాలని కోరడంతో పాటు రాయితీలు కల్పించాలని కోరే అవకాశం ఉంది.

ఈ భేటీలో కార్యక్రమంలో ఫిలిం ఛాంబ‌ర్ అధ్య‌క్షులు నారాయ‌ణ దాస్, కె.ఎస్.రామారావు, దామోదర్ ప్రసాద్, ఏషియన్ సునీల్,  స్రవంతి రవికిశోర్, సి.కళ్యాణ్, ఎన్వీ ప్రసాద్, జెమిని కిరణ్, సుప్రియ, భోగవల్లి బాబీ, యూవీ క్రియేషన్స్ విక్కీ - వంశీ తదితరులు పాల్గొన్నారు. పంపిణీ, ఎగ్జిబిష‌న్ రంగాల నుంచి ప్ర‌తినిధులు కూడా ఈ సమావేశానికి హాజ‌ర‌య్యారు. ఇండస్ట్రీలో నెలకొన్న అసంతృప్తిపై సానుకూల వాతావరణం వచ్చేలా అందరూ కలిసి చర్చించుకోవాలని ఈ సందర్భంగా తీర్మానించారు. అలాగే పరిశ్రమలోని వివిధ విభాగాల్లో ఎదుర్కొంటున్న  సమస్యల గురించి కూలంకుషంగా చర్చించారు.




మరిన్ని

కొత్త సినిమాలు

మరిన్ని

గుసగుసలు

మరిన్ని

రివ్యూ

మరిన్ని

ఇంటర్వ్యూ

మరిన్ని

కొత్త పాట గురూ

మరిన్ని